Wieshaid van Jezus Sirach 31
01Nait sloapen kinnen van riekdom, doar teert t liggoam van weg,
zörg over riekdom holdt die wakker.
02Zokse zörg moakt dastoe alderdeegs nait doezelst,
as n slimme zaikte verdrift hai sloap.
03n Rieke schript en knooit en bultjet zien geld op,
en as e opholdt mit waarken, het e der genot van.
04n Aarme schript en knooit en het n schoamel bestoan,
en as e opholdt mit waarken, het e zien gerak nog nait.
05Dij van gold holdt, kin nait rechtveerdeg blieven,
dij t om riekdom te doun is, komt op biesterboan.
06Mennegain is deur geld te valen kommen,
ze stonden inains veur heur ondergang.
07Gek op gold wezen, is n stroekelblok,
elke onwieze strovvelt ter over.
08Wat gelokkeg is n riek man doar niks op aan te maarken vaalt,
en dij nait achter gold heer zit.
09Wèl is t? Den zel we hom gelokkeg priezen,
want hai het onder zien volk wat boetengewoons doan.
10 Wèl wer deur gold oetperbaaierd en bleek zuver in hoed te wezen?
Hai zel der om prezen worden.
Wèl kon zundegen en het t nait doan,
wèl kon verkeerd doun mor dee t nait?
11 Zien bezit zel aanwazen,
en haile gemainschop zel t over zien weldoaden hebben.
12 Astoe bie toavel zitst, van ales verzain,
scheur mond den nait open
en zeg nait: "Wat staait ter ja n zoot op!"
13 Bedenk dat n begereg oog n min ding is,
is ter wat malers schoapen as zo'n oog?
Doarom troant t bie ales wat e zugt.
14 As ain noar n schuddel kikt, tast den nait tou,
grobbel den nait tougelieks mit hom in schuddel.
15 Beoordail gevuilens van dij bie die aan toavel zit as dij van die zulm
en bruuk bie ales dast dust, dien verstand.
16 Eet as n fersounlek mensk van aal dat die veurzet is,
wees gain vreetop, dat geft aargernis.
17 Wees zo fersounlek as eerste op te holden,
wees gain vreterd, geef gain aansteut.
18 En astoe mit n haile koppel bie toavel zitst,
bedain die zulm den nait as eerste.
19 Veur ain dij goud opvud is, is n beetje al genog,
hai ligt nait te poesten en te stìnnen as e op bèr ligt.
20 As e zok moategd het mit eten, slept e as n roos,
hai gaait ter vroug òf en vuilt zok haildaal oetrust.
Dij nait zat te kriegen is, het last van wakker liggen,
mout spijen en het liefzeerte.
21 Astoe der nait veur vot kinst veul te eten,
goa der den oet om te spijen, den vuilst die n stok beter.
22 Kind, luster noar mie, neem mien road in acht,
loater zelst t begriepen.
Wastoe ook dust, dou dat mit iever,
den krigst gain enkele zaikte.
23 Dij zok goud aanstelt bie etenstoavel wordt prezen,
hai zel aaid n goie noam hebben.
24 Van ain dij zok nait goud aanstelt, sprekt haile stad schaande,
hai zel aaid n minne noam hebben.
25 Wees gain boaskerel bie t wiendrinken,
want wien het mennegain te gronde richt.
26 Zo as ovent stoal keurt hou haard of t is,
zo keurt wien t kerakter van hoogmoudege lu as ze roezie moaken.
27 Wien staait veur mensk liek mit t levent
astoe hom mit moate drinkst.
Wat is levent zunder wien?
Wien is al in t aanbegun geven om blied van te worden.
28 As wien op zien tied mit moate dronken wordt,
geft e bliedschop en vreugde.
29 Te veul wien komt ellèn, roezie en kwezzie van.
30 Dronkenschop moakt n onwieze zo kwoad dat e te valen komt,
ontnemt hom zien macht en bezörgt hom ook nog wonden.
31 Moak gain roezie mit dien noaste as ie mit nkander wien drinken
en minacht hom nait as e vrolek wordt.
Most hom ook nait oetschelden
en hom nait krenken deur wat van hom weerom te vroagen.
|
